बाल गीत : दुर्गा प्रसाद पारकर

🟥
हमर गवंई गाँव

सरग ले सुग्घर हमर गवँई गाँव
जिहां आमा अमली के जुड़ छांव

गाँव वाले मन करथे मन भर खेती
खेती ला कहिथे उमन अपन सेती

नदिया नरूवा म बोहावत पानी के धार
धार ह रहिथे खेती किसानी के आधार

खपरा छानी जिंहा के चिन्हारी
हरियर हरियर दिखय बखरी बारी

बारो महीना आनी बानी के तिहार
मया पिरित के पहिरे रहिथे हार

🟥
ढेरा

चार छै पकती के ढेरा बने रहिथे
सन अउ सुमा डोरी आंटत रहिथे

सुमा डोरी आट के मजबूत बना ले
खटिया गाँथ के मन भर सुसता ले

सन ल आट के मोठ डोर बनाथे
गाड़ा ल बांधे बर सजोर बनाथे

ढेरा कस जीनगी गोल घुमत हे
सुरूज कस जीनगी उवत बुड़त हे

🟥
खुमरी

कड़रा मन बांस ले खुमरी बनाथे
घाम पानी ले खुमरी ह बचाथे

बरदिहा मन खुमरी ओढ़ के जाथे
अलगोजवा बजावत बरदी चराथे

खुमरी ओढ़ के किसान खेत जाथे
नांगर बक्खर चलाथे खेत म जाके

रंग बिरंग के खुमरी ओढ़ के जाथे
राऊत मन घर घर नाचे बर आथे

🟥
नंगरिहा

नांगर बोह के खेत जोते बर नंगरिहा जाथे
झेंझरी म धान धर के बांवत कर के आथे

धान के बाढ़े के बाद बियासी नांगर चलाथे
रोपा लगइया मन ह कोप्पर ले खेत मताथे

नींदई कोड़ई करके धान ल बरोबर चालथे
खेती किसानी के बखत सुग्घर ददरिया गाथे

खेती किसानी करके नंगरिहा धान उपजाथे
किसन के बड़े भइया हलधर बलराम कहाथे

•••••

•संपर्क-
•79995 16642

🟥🟥🟥🟥🟥🟥