छंद

■राजिम मेला
-प्रिया देवांगन ‘प्रियू’
[ पंडरिया,कबीरधाम, छत्तीसगढ़]

छन्न पकैया छन्न पकैया, आगे राजिम मेला।
चारो कोती बगरे हावय, किसम किसम के ठेला।।

छन्न पकैया छन्न पकैया, भीड़ हवय जी भारी।
धक्का मुक्की दे के रेंगत, दाई देवत गारी।।

छन्न पकैया छन्न पकैया, घूमे ला सब जाबो।
अब्बड़ झूला झुलबो संगी, चाट पकौड़ा खाबो।।

छन्न पकैया छन्न पकैया, सरकस वाला आ हे।
भालू बंदर हाथी घोड़ा, अपन संग मा ला हे।।

छन्न पकैया छन्न पकैया, मन मा खुशी समागे।
बइठे बइठे सोंचत हावौ, राजिम मेला आगे।।