■दाऊ रामचंद्र देशमुख के 105 वीं जयंत म विशेष. ■दूरदर्शन के माध्यम ले मुलाकात होय रीहिस दाऊ जी ले.

♀ दाऊ रामचंद्र देशमुख का जन्म 25 अक्टूबर 1916 को बालोद जिला के डौंडीलोहारा विकासखण्ड गांव ‘पिनकापार’ में हुआ था.
♀ 7 नवंबर 1971 को गांव ‘बघेरा’ जिला-दुर्ग में सांस्कृतिक पुनर्जागरण के उद्देश्य को लेकर सांस्कृतिक संस्था ‘चंदैनी गोंदा’ का गठन किये थे दाऊ जी.
♀ 13 जनवरी 1998 को दाऊ जी का निधन हुआ.

जब मोर जनम होइस वोकर ले दू साल पहिली “चन्दैनी गोंदा “के जनम होगे रहिस हे. अउ जब येखर सर्जक श्रद्धेय दाऊ रामचंद्र देशमुख जी ह जब येला कोनो कारन ले आगू नइ चलइस त मात्र
आठ साल के रहेंव. मेहा दाउ राम चन्द्र देशमुख जी द्वारा संचालित” चन्दैनी गोंदा “ल कभू नइ देखेंव. दाउ जी ले घलो कभू आमने- सामने भेंट नइ कर पायेंव. मोर अइसन सौभाग्य नइ रीहिस हे. पर
मोर डायरी म दैनिक सबेरा संकेत
राजनांदगांव के “आपके पत्र “स्तंभ के पेपर कटिंग हे. वोखर मुताबिक मेहा दूरदर्शन केन्द्र रायपुर के कार्यक्रम “एक मुलाकात ” के तहत जब श्री राम हृदय तिवारी जी ह दाऊ जी ले “गोठ बात “करे रीहिस हे वोला मेहा गजब रुचि लेके सुने रेहेंव. काबर कि मेहा कई ठक अखबार म श्रद्धेय दाऊ जी के जीवन परिचय, चन्दैनी गोंदा अउ “कारी” के बारे म पढ़े रेहेंव. उद्भट विद्वान डॉ. गणेश खरे जी के लेख के सँगे सँग कुछ अउ विद्वान मन के लेख ल पढ़े रेहेंव. जब दूरदर्शन केन्द्र रायपुर ले ये भेंटवार्ता ह शुरु होइस त मेहा आखिरी होत तक टस से मस नइ होयेंव. ये भेंटवार्ता ले मोला छत्तीसगढ़ लोक कला मंच के विकास यात्रा म दाऊ रामचंद्र देशमुख जी के योगदान के सुग्घर जानकारी मिले रीहिस हे. आदरणीय राम हृदय तिवारी जी ह दाऊ जी गजब अकन सवाल करिन कि देहाती कला विकास मंडल अउ चन्दैनी गोंदा के गठन अउ कारी के मंचन के का उद्देश्य रीहिस हे. चन्दैनी गोंदा के पहिली इहां के नाचा अउ लोक कला मंच के कइसन दशा अउ दिशा रीहिस हे .चन्दैनी गोंदा ल आप विसर्जित करे जइसे कठिन निर्णय काबर लेंव. अइसे का परीस्थिति अइस! ये सवाल जब आदरणीय तिवारी जी ह श्रद्धेय दाऊ जी ले करिस त एकदम भावुक घलो होगे. वर्तमान म लोक कला मंच के दशा अउ दिशा उपर जब चर्चा चलिस तब दाऊ जी ह गजब उदास होगे अउ कहिस कि हमर छत्तीसगढ़ के स्वाभिमान ल जगाय बर काम नइ हो पावत हे. लोक कला मंच के नाम म सिनेमा संस्कृति ह हावी होगे हे. अइसे कहत -कहत दाउ जी ह एकदम गंभीर होगे.
सुग्घर “गोठ- बात ” ह 21 मार्च 1996 म प्रसारित होय रीहिस हे.
दाऊ रामचंद्र देशमुख जी के जनम 25 अक्टूबर 1916 म बालोद जिला के डौंडीलोहारा विकासखंड के गाँव पिनकापार म होय रीहिस हे. वोहा 1951 म देहाती कला विकास मंडल के गठन करिस. येमा लाला फूलचंद श्रीवास्तव जी चिकारावाला (रायगढ़), ठाकुर राम जी , बुलवा (रिंगनी साज), रवेली साज के मदन निषाद जी (गुंगेरी नवागाँव, डोंगरगॉव, राजनांदगांव) जइसे बड़का कलाकार शामिल होगे. दाऊ जी ह ये कलाकार मन ल लेके काली माटी, बंगाल का अकाल, सरग अउ नरक, राय साहब मि. भोंदू खान साहब नालायक अली खां, मिस मैरी का डांस जइसे प्रहसन खेल के मनोरंजन के सँगे सँग जनता ल संदेश घलो दिस.
अउ 7 नवंबर 1971 म अपन गाँव बघेरा (दुर्ग) मा सांस्कृतिक पुनर्जागरण के उद्देश्य लेके लोक सांस्कृतिक संस्था “चन्दैनी गोंदा “के गठन करिस. दाउ जी ह चन्दैनी गोंदा, कारी के माध्यम ले छत्तीसगढ़वासी मन के स्वाभिमान ल जगइस. चन्दैनी गोंदा के माध्यम ले लक्ष्मण मस्तुरिया जी, खुमान साव जी, केदार यादव जी, साधना यादव जी, भैया लाल हेड़ाऊ, कविता हिरकने (वासनिक ), संगीता चौबे, अनुराग ठाकुर जइसे उम्दा कलाकार सामने आइन.
मेहा दाऊ जी द्वारा संचालित चन्दैनी गोंदा ल कभू नइ देखेंव पर
बाद म लोक संगीत सम्राट श्रद्धेय खुमान साव जी द्वारा संचालित चंदैनी गोंदा ल घलो मात्र दो बार देख पायेंव .पर श्रद्धेय खुमान साव जी ले भेंट नौ बार होइस हे. येखर संस्मरण घलो लिखे हवँ.
हमर छत्तीसगढ़ के सांस्कृतिक पुनर्जागरण के अग्रदूत ये महामानव ह 13 जनवरी 1998 म अपन नश्वर शरीर ल छोड़ के स्वर्ग लोक चले गिस. दाऊ जी ह अपन यश रुपी शरीर ले सदैव जीवित रहि. श्रद्धेय दाउ जी ल उंकर 105 वीं जयंती म शत् शत् नमन हे. विनम्र श्रद्धांजलि.

●ओमप्रकाश साहू ‘अंकुर’
●सुरगी,राजनांदगांव, छत्तीसगढ़

●●● ●●●