■छत्तीसगढ़ी ग़ज़ल ■डॉ. बलदाऊ राम साहू

खुद ल जउन हुशियार समझ बइठे हे
बैरी मन ला यार समझ बइठे हे।

पूछत – पूछत रद्दा रेंगत रहिस हे
ठीहा ल ओ सियार समझ बइठे हे।

गाँव-शहर उनकर आना – जाना हे
जिनगी ला बइपार समझ बइठे हे।

डार – डार मा बइठे हे घुघुवा मन
उनला ओ रखवार समझ बइठे हे।

बात-बात म जउन मन भड़कावत हे
उनला खेवनहार समझ बइठे हे।

मीठलबरा के मीठ – मीठ बानी हे
का कहिबे ब्यवहार समझ बइठे हे।

कतको मनखे इहाँ आवत-जावत हे
लुचपतिया ल सरकार समझ बइठे हे।

[ ●ठीहा-निर्धारित चिन्ह. ●सियार-सरहद. ●घुघुवा-उल्लू. ●रखवार-पहरेदार. ●खेवनहार-नाविक. ●मीठलबरा-चिकनीचुपड़ी बात करने वाला. ●लुचपतिया-बिचौलिया/भ्रष्टाचारी. ]

■■■ ■■■