■मकर संक्रांति पर विशेष. ■मकर संक्रांति ले सूर्य उत्तरायन होथे-डॉ. नीलकंठ देवांगन.

सूर्य के एक राशि ले दूसर राशि मं प्रवेश करना संक्रांति कहलाथे | ये शब्द संक्रमण से बने हे | एखर सीधा संबंध ग्रह मन के राजा सूर्य के संक्रमण से हे | येहा साल भर मं बारह राशि मं भ्रमन करथे | जब सूर्य धनु राशि ले मकर राशि मं प्रवेश करथे, तब मकर संक्रांति होथे | सबो संक्रांति के अपन ज्योतिषीय अउ धार्मिक महत्व हे फेर सबले महत्वपूर्ण मकर संक्रांति हे काबर के इही दिन ले उत्तरायन शुरू होथे |

मकर संक्रांति ले शुरू होथे देवता मन के दिन- उत्तरायन काल ल देवता मन के दिन माने जाथे अउ दक्षिणायन ल देवता मन के रात |मकर संक्रांति ल देवता मन के दिन के प्रभात काल माने गेहे | एखर सेती ये दिन सबेरे नहा के देवता मन ल फूल, अर्घ्य, धूप दिये जाथे | पौरानिक मान्यता हे के ये दिन के दिये गये दान पुन्न सौ गुना फलदायी होथे |

उत्तरायन -दक्षिणायन – अयन के अर्थ होथे-घर | सूर्य आकाश मं या तो उत्तर तरफ झुके रहिथे या दक्षिण तरफ | सूर्य के उत्तर तरफ झुके होना उत्तरायन कहलाथे अउ दक्षिण तरफ झुके होना दक्षिणायन | मकर से मिथुन तक छः राशि मं सूर्य उत्तरायन अउ कर्क से धनु तक छः राशि मं दक्षिणायन रहिथे |

उत्तरायन यानी देवता मन के दिन- येला आदान काल भी केहे जाथे काबर के ये समय सूर्य प्रकृति ले जल सोंखथे, लेथे | उत्तरायन काल मं छः राशि मं परिभ्रमन करत सूर्य के कांति बढ़त जथे |अच्छा काम करे के शुभ दिन प्रारंभ होथे | जनवरी से जून तक कांति चरम मं पहुंच जथे |

दक्षिणायन यानी देवता मन के रात- येला निसर्ग काल भी कमकरहिथें काबर के सूर्य प्रकृति से लिये जल लौटा देथे | दक्षिणायन के छः महीना सूर्य के कांति घटत जथे | इही कारन चौमासा मं मंगल कार्य नइ होवय | हां, धरम के बढ़ोत्तरी बर जप, तप, व्रत, नियम, कथा पूजा विशेष माने जाथे | जाने अनजाने दोष के प्रायश्चित बर पुन्य के संचय किये जाथे |

मकर संक्रांति के बाद मृत्यु के कामना- उत्तरायन मं मृत्यु के आकांक्षा जानकार मन करथें | अग्नि, ज्योति अउ प्रकाश से भरे गति होथे , शुक्ल गति होथे | भीष्म पितामह अपन मृत्यु ल उत्तरायन आरंभ होय तक रोक ले रिहिसे | ओला इच्छामरनी के वरदान रिहिसे | उत्तरायन मं मृत्यु यानी तेजस्वी प्रकाशमय मृत्यु |

दक्षिणायन मं मृत्यु यानी कुहरा अउ अंधकार से भरे गति, कृष्ण गति | कुहरा जइसे काला अउ अंधकार जइसे डरावना जीवन आदमी ल निकृष्ट मृत्यु तक खींच के ले जथे |

ये दिन हमू मन ल संक्रमण करे के शुभ संकल्प लेना चाही | जिनगी मं भरे अज्ञान, संदेह, अंधश्रद्धा, जड़ता, कुसंस्कार अंधकार के सूचक हे | येला सही संपूरन ग्यान,श्रद्धा, चेतना,सोच, सुसंस्कार से दूर करे के, हटाय के प्रयास करना चाही | इही सच्ची संक्रांति होही |

मकर संक्रांति 14 जनवरी के माने गेहे | फेर कभू कभू अधिक मास या मल मास होय ले संक्रांति के समय 24 से 36 घंटा बढ़ जथे तब मकर संक्रांति के तिहार 15 जनवरी के मनाय जाथे, हर बार नहीं |
संक्रांति मतलब सम्यक क्रांति- प्रकाश के अंधकार पर विजय | क्रांति मं केवल परिस्थिति परिवर्तन के आकांक्षा होथे , हिंसा के भाव जागथे | संक्रांति मं समझदारी प्रधान होथे,अहिंसा के भाव होथे | दिमाग मं भरे विचार ल बदलना हे |

■लेखक संपर्क-
■84355 52828

◆◆◆ ◆◆◆