🟡 कृष्ण जन्माष्टमी पर विशेष : डॉ. नीलकंठ देवांगन.

🟡 सबके प्रेरक हैं मुरलीधर श्री कृष्ण.

श्री कृष्ण ले पूरी दुनिया,सारा संसार कर्म, धर्म अउ भक्ति के प्रेरना पाथे | सबके जिनगी के प्रेरना हें श्री कृष्ण | ओखर संग हमर नाता जतका आत्मीय हे ओतका कोनो दूसर भगवान या भगवान के अवतार संग नइहे | संबोधन मं घलो दूरी मंजूर नइहे | एखरे सेती ओला कृष्ण नांव ले कम, कन्हैया, कान्हा, गोपाल, किशन. गिरधर, मुरलीधर, नंद के छोरा कहिके जादा बलाथें | पुरान मं ओला भगवान विष्णु के पूर्ण अवतार केहे गेहे | ओखर कर्म सिद्धांत अनोखा हे, सर्व मान्य हे |

कृष्ण के अलौकिक लीला – देश के लोगन मन के मन मं कन्हैया लम्बा समय तक राज करिस | दिव्य अलौकिक लीला करिस | ओला तीन भाग मं बांट सकथन – 1 ब्रज लीला जेमा ओखर बाल लीला हे , 2 वृंदावन लीला जेमा गोपी अउ राधा संग प्रेम भरे माधुर्य लीला हे , 3 द्वारिका लीला जेमा पार ब्रम्ह संबंधी ईश्वर लीला हे |

कृष्ण के मुरलीधर रूप – कृष्ण के कई रूप हे | ओमा सबले लोक प्रिय रूप हे – मुरलीधर | मुरली के बिना ओखर कल्पना संभव नइ हे | मुरली मं जिनगी के कई अर्थ निकलथे | चेतना जगाथे मुरली | अंतरात्मा के आवाज सुने के माध्यम हे मुरली | गोपी मन मुरली के धुन सुन के ध्यान मं चल देवंय | ध्यान ले ही ओमन प्रभु से साक्षात्कार कर लेवत रिहिन | ओखर मुरली कोनो साधारन मुरली नोहय | कन्हैया जब अपन कोमल होंठ मं लगाके मीठी फूंक मारय, त सबो मोहा जंय |

मुरली के नौ द्वार – मुरली मं नौ छेद होथे जउन ल नौ द्वार केहे गेहे | मनुष्य के शरीर मं भी नौ द्वार हे – दू आंखी, दू कान, दू नथुना, एक मुंह, एक गुदा, एक जननेंद्रिय |

मुरली के सात स्वर – मुरली मं सात स्वर होथे – 1 सा, 2 रे , 3 ग, 4 म, 5 प, 6 ध , 7 नि |

कन्हैया के मुरली मं ये सात स्वर अउ सात श्रुति के संगम सुनाई देथे | सात स्वर मं शरीर के सात चक्र खुलथे |

स्वर मं आयुर्वेद – इही सात स्वर मं सारा आयुर्वेद समाहित हे | आयुर्वेद वात, पित्त, कफ के इलाज करथे | सात स्वर मं ओखर योजना अइसे बनथे – सा रे ग कफ विभाग, म प ध पित्त विभाग, ध नि स वात विभाग सबके राग निश्चित हे | रोग के अनुसार राग गाये जाथे |

आनंद उत्सव हे कृष्ण जन्माष्टमी – हमर छत्तीसगढ़ मं जन्माष्टमी व्रत उत्सव अउ आनंद उत्सव के रूप मं मनाय जाथे | सबके घर इही गूंजत रिथे – नंद घर आनंद भयो, जय कन्हैया लाल की | मुरलीधर कन्हैया के बाल मनोहारी छबि ल निहारत, पूजा करत सबो आनंद रस मं डूबे रिथें |
श्री कृष्ण सबके हे | समाज ल जउन चाही वो सब कृष्ण मं हे | संपूर्ण जीवन के प्रतीक हें श्री कृष्ण | सबके प्रेरक हैं मुरलीधर श्री कृष्ण |

•संपर्क –
•84355 52828

🟡🟡🟡🟡🟡🟡