🕉 लक्ष्मी निकलिस, लक्ष्मी आइस – टीकेश्वर सिन्हा ‘ गब्दीवाला ‘

3 years ago

233

मनखे के जिनगी भर के कमई होथय लोग-लइका हा। उही कमई ल देख-देखके वो जिनगी ल बिताथै। तभे तो छगन ह अपन चारों बेटा मोहन, राजेश, करण अउ हेमंत ल पाके खुद ल राजा दशरथ ले कम नइ समझै। सब के बर-बिहाव निपट गेय रिहिस। सब बढ़िया कमावत-खावत रिहिन। चारों भाई के एकक-दुदूझन बाल-बच्चा आगे रिहिस। सब के सबझन संग बढ़िया तारी पटै। कोनों भाई म न कोई ईरसा-दुवेस; अउ न तो कोनों देरानी-जेठानी म हिजगा-पारी। छगन हर सिधुवा रिहिस; पर वोकर सुवारी पारबती ह थोरिक अलगे मिजाज के रिहिस। घर म वोकरे चलै। गाँव के मन गोठियाय; अउ मजा लेवै- ” जेकर घर डउकी सियान, तेकर मरे बिहान।”
समय बड़ा बलवान होथै। वो अपन हिसाब से चलथय अउ सबला अपन मुताबिक चलाथै। कोनों मनखे ह कुसमय अउ दुख-पीरा के थपेड़ा ले नइ बाँचै। आज कोन कोती ले कोन चाल के झकोरा आइस कि तो छगन तेली के किस्मत फूटगे। परोसी लइका मन घर म आके मार उत्ता-धुर्रा गोठिया डारिन कि हेमंत भइया ह बड़े दाऊ घर के टेक्टर म चपका गे; अउ खतम होगे। सुनते साठ सबके हालत खराब होगे। आँय काहत, बाँय होगे। घर म रोहा-राही परगे। पूरा गाँव सिनियागे।
साँझ-रात के होवत ले हेमंत के काठी परिस। माटी के काया माटी म मिलगे। सगा-सोदर आइन-गिन। गाँव वाले मन के तको साथ मिलिस। सोक कार्यकरम बने-बने निपट गे। चार-पाँच महीना तक घर म मातम छाय रिहिस।
गुजरत समय के संगे-संग घर के इस्थीति-परिस्थीति बदलत गिस। धीरे-धीरे सबके मति फिरन लागिस। ईरसा-दुवेस घर म पाँव जमान लागिस। अपन-तुपन सुरु होगे। छगन ह घर के बनोखी बनाय के बड़ उदिम करै। कतको अनित बात ल वोह कान नइ धरै। बेटा मन के आपसी प्रेम-बेवहार ल बनाय खातिर अपने आँसू ल अपने पियलै। पर नारी-परानी के बात अलग होथै। छगन ल कभू-कभू अइसे घलो लागय कि हिजगा-पारी करई ह माईंलोगिन मन के जनमसिद्ध अधिकार ए। ये घर-परवार म तो सबले जादा ये बात रिहिस कि पारबती ह घर के माईंलोगिन सियान हो के घला घर ल नइ सम्भाल सकिस। बहू मन के आपसी मया-पिरीत ल तिड़ी-बिड़ी कर डारिस। कोनों बहू ल बने काहय त कोनों ल गिनहा। अइसने-अइसने बहू मन छिही-बिही होगें। देरानी-जेठानी ल हिजगा-पारी के गरेर घेर लिस। ईरसा-दुवेस के करा पिटन लागिस। कोनों हर तो कोनों संग नी गोठियाय,त कोनों ह कोनों ल देखके मुँहू ल फुलाय। इँकर एक-दूसर ऊपर ताना-बाण खूब चलै। कोनों झँझेटत हे, त कोनों ह आँखी तरेरत हे। सबले जादा बड़ मुस्किल तो ये होगे राहय कि पारबती ह बहू मन ल एक-दूसर बर अउ भड़काय।
एक दिन छगन ह फरदफोड़ बजार ले आइस। झोला ल परछी म मढ़ावत पारबती ल पुछिस – “मँझली बहू गिरजा नइ दिखत हे ओ… काँह गेय हे?”
“कहाँ जाही…! जोरगे हे बारा बजे के। आज एक आड़िक-काड़िक नी करे हे। बड़की पूर्णिमा ह बियारा गिस हे कातो; काबर गेय हे ते।” पारबती के झँझेटा ल सुन के छगन एक ले दू नइ बोलिस।
“मोला जोरगे सँउख लागे हे का…! बने-गिनहा म का करबोन ! तेंहा अपन ल तो पहिली देख।” पारबती ह गिरजा के गोठ ल सुन के सीट ले होगे। अइसना रोज कुछू न कुछू ओखी म सास-बहू; अउ नहीं ते देरानी-जेठानी म झगरा मातिच जाय। सबले जादा समस्या छोटकी बहू लक्ष्मी ल राहै। अब तो वो घर म वोकर कोई अधार नहीं हे तइसे होगे राहय हेमंत के गुजरे ले। वोकर मांग के सेंदूर का पोंछाइस; वोकर जिनगी म लिखाय सरी लेखा ह पोंछागे। पति के हाथ छुटगे, मानो सरी दुनिया के साथ छुटगे। अब कोरा के बेटी बर ही वोला जीना हे। उही नानुक ल देखके जियई होगे। पति हेमंत के जाये ले लक्ष्मी हर सबके ल सुनै। कोनों ल पलट भाखा नइ दे पाय। ससुर छगन बिचारा ह वोला बड़ भाय। वोला लागय कि ये बपुरी ह ये घर म दुख-पीरा सहे बर आय हे। पर सब अपन-अपन मनमरजी रहइया बेटा-बहू मन ल कुछू नइ बोल पाय।
घर के सब झन लक्ष्मी ल तपे के सुरु करदिन। जेठ मन तो वोकर चेहरा देखई तक असुभ मानैं। घर ले वोला निकाले के मन बना डारिन। कोनों-कोनों तो लक्ष्मी के मइके ल गारी देवत वोला ताना मारैं। खाय-पीये के दुख देय के सुरु करदिन। कतको घाँव गाँव वाले मन इँकर समस्या ल सुलझाय के घला कोसिस करिन; पर सब बेकार।
आज बिहनिया खेत बर बनिहार तियारे बर घर ले निकलत खानी राजेश पारबती ल कहिथे – “दाई…! अओ…! तोर वो छोटे बहू ल बने समझा दे। हमन कोनों काम-काज करे बर घर ले निकलथन त हमर आगू म मत आये करै। वोकर मुख देखे ले कोनों काम-कारज सिद्ध नी होय।” ये बात ल लक्ष्मी सुन डारिस। कलेचुप लइका ल धरे कँदरत रहिगे। अइसना रोज-रोज कुछू न कुछू बहाना ले के कोनों न कोनों वोला ताना मारैं। लक्ष्मी ह रोज तीन आँसू रोवय। हिरदय फटय वोकर।
घर के मन तो, सिरिफ छोटे मँझली बहू गीता ल छोंड़के, सब लक्ष्मी के माय-मइके के सातपुरखा म पानी रितोय। आज तो लक्ष्मी ल आहू कहे बर नइ छोंड़िस पारबती ह कि येकरे आय ले ये घर के बेंदरा-बिनास होवत हे। येकर अवई ह घर ल थोरिक नइ फुरत हे। दाँत ल पिसत किहिस- ” कहाँ-कहाँ ये मोरे घर म आय हे। मोर हीरा अस बेटा ह येकर आय ले भगवान घर चलदिस। अब कोनजनी कऊन ल अउ काय करही ते।” रोज घर म अइसना रेवाँ-टेवाँ चलते रिहिस। सरग सिधारे अपन मयारू आदमी के सुरता करत अउ माय-मइके ल बदनामी ले बचाय बर लक्ष्मी ह अपन ये छइंहाँ ल नइ छोड़ना चाहत रिहिस। घर वाले मन अतियाचारी बढ़ते गिस।
साहत भर ले बिचारी ह साहिस, कतेक ल घला साही अब। आज नानकुन नोनी ल धरिस। वो घर ले सबके आगू म निकलिस साल भर के तिहार भरे-देवारी म सिरहुती के दिन। नोनी ल छाती म ओधाय एकठिन गमछा ले वोला ढाँके रिहिस। घर भर के मन देखते रहिगें। मुँड़ ल ढाँकत परछी ले अंगना म पाँव राखिस। गोबर ले लिपाय दुवार म पाँव परते गिस, चक-चक पाँव-पाँव दुवार उखनत गिस। जइसने पाँव परय; तइसने भुइंयाँ उखनै। बाहिर मुँहाटी के जावत ले दुवार भर पाँव के चिनहा परगे। छोटे मँझली जेठानी गीता ह दुवार के उखने भुइंयाँ ल देखिस। समझिस कि आज के दिन मँझनिया बेरा ये छोटकी लछमी निकलत हे ये घर ले, याने ये घर के लक्ष्मी निकलत हे। जइसे ही लक्ष्मी के दूनों पाँव मुँहाटी के बाहिर पार माड़िस। रोवत-रोवत निहरके चौंखट ल छूवत मुँड़ नवाइस; अउ खोर म निकलगे।
गली-गली जावत लक्ष्मी ल अरोस-परोस के मन अपन-अपन घर-मुँहाटी ले देखत फुसुर-फुसुर गोठियान लागैं- “दू दिन तिहार ल तो मान लेय रतेस ओ। भरे तिहार-बार के तोला घर तजे ला परगे। आज वो घर के छोटकी बहू लछमी नहीं; भलुक देबी लछमी ह घर छोंड़त हे। बने हे बपुरी हा; इँकर घर के मन ह एक कनिक सँहराय के लाइक नइ हें।” सबके गोठ ह लक्ष्मी के कान म परत राहै। आँखी ह पलपल-पलपल करत राहै। तीन बछर पहिली इही खोर-गली ले हाँसत-मुस्कात हाँथ म मेहंदी, पाँव म माहूर , लाली मांग साजे अउ लाली लुगरा पहिरे छुनुक-छुनुक करत आय रिहिस, तेन हर वोला सुरता आवत राहै। पर आज काय करबे “वर गय त घर गय”। पति बिना गति नहीं। पति के जिहाँ पाँव नहीं, वो गाँव ह गाँव नहीं” होगे वोकर बर।
कपाट ल मुँड़ म बोहे धोय बर तरिया जावत एकझन मनखे के भाखा निकलिस- ” हत रे करमछंडा छगन ! अहा सुरहोती के दिन नादान ल धरे राँड़ी-रूही जवान बहू ल घर निकाल देयेस।” नानुक लइका धरे जावत छगन तेली घर के छोटकी बहू ल कोनों रोकना नइ चाहिन। सब जान डारिन हेमंत के बाई रोवत-ललात घर ले निकलगे कहिके।
गाँव ले निकलिस। संझा के सुरुज ह बूड़ती कोति ओधन लागिस। एकठिन रोड़ गाँव जगतरा म आइस। नानुक लइका धरे लक्ष्मी ले एक झन इस्कूटी वाले नाहकिस। दरपन म झाँक के पाछू डाहर ल देखिस। वोला लक्ष्मी बड़ दुखियारिन लागिस। पूछथै- “काँह जाबे ओ साँझ होवत हे। नानकिन लइका धरे हावस। बइठ बे ते बइठा लेहूँ।”
“हाव भइया। बइठा ले गा। जाय बर तो मैं हर खुरसुनी जाहूँ। पर मोला देवरी मोड़ उतार देबे। मोला लेगे बर कोनों आ जाही। खुरसुनी मोर मइके आय। कोन्हों ल होय लेगे बर बलाहूँ।” नोनी ल डेरी ले जेवनी खाँध कोती लानिस। लुगरा ल सकेलत लक्ष्मी इस्कूटी म बइठिस।
“परसोदा ले लगे हे, तेन खुरसुनी ल कहिथस का ओ ?” इस्कूटी वाले लक्ष्मी ल तिखारिस।
“हाव…। परसोदा अउ भर्रेगाँव ले बिल्कुल लगे हे।” लक्ष्मी किहिस।
“अच्छा ! काकर घर जाबे ओ ? महूँ हर उही करके गाँव सिब्दी रहिथँव। मोर बहुत झन संगवारी हें उहाँ। सब पढ़े मोर संग दाऊटोला इस्कूल मा।” इस्कुटी वाले ह किहिस।
” गिरधारी लाल सोनबरसा ह मोर पिताजी ए। मैं वोकरे बेटी अँव।” नानुक ल थपकी देवत लक्ष्मी किहिस।
” अरे वाह…! गिरधारी सोनबरसा गुरुजी के बेटी आस ओ। वोकर मँझला बेटा कमलकांत मोर संग पढ़े हे। मैं तो कमलकांत के घर गेय रहेंव वोकर बहिनी के बिहाव मा।” हाँसत-हाँसत इस्कूटी वाले किहिस।
“में हर ताँव गा… वोकर बहिनी अँव। मोर लक्ष्मी नाँव हे। मोर बाद लक्ष्मीकांत हरै। सबले बड़े सूर्यकांत, अउ कमलकांत के बाद मेंहा आँव। अइसन म तो तैंहा मोरे सादी म आय रहेस।” नानुक ल पाय-पाय लक्ष्मी किहिस; अउ इस्कूटी ले उतर के इस्कूटी वाले के टूप-टूप पाँव परिस।
“तैं अब चिंता मत कर नोनी। कमलकांत के बहिनी; माने मोर बहिनी आस। मोर नाम सूरज हे। चल तोला घर म छोड़ देहूँ। कमलकांत ल मैं बता देथँव। वोकर नंबर मोर मेर हावय। चल बइठ। मौसम तको बिगड़त हे।” सूरज ह फोन लगा के लक्ष्मी के मइके खबर कर दिस।
**
ये डाहर बहू लक्ष्मी के घर ले निकले ले तरुवा ल धरके छगन बइठे राहै। बड़ चिंता होगे राहै छगन ल नान्हे बहुरिया लक्ष्मी के। का होही…कइसे होही… वोकर मन म चलत राहै। तभे पारबती आके लक्ष्मी के बारे म कहिथे- “कोन जनी वो काँह गियिस होही नानुक लइका ल धरे तिहार बार के। अतेक वोला हमन ….!”
“बस तैं हर कलेचुप रहा। तोर जी जुड़ाइस होही अब, आज के दिन वो लछमी निकलिस हो ही त। तैं जादा नाटक झन कर।” छगन के तात-तात गोठ ल सुन के पारबती के मुँहड़ा बँधागे। पारबती ल अलकरहा लाग गे। वो परछी ले दुवार म निकलत रिहिस तइसने म बड़की बहू पूर्णिमा कहिथे- “मोला बने ढंग नी लागत हे। छाती ह बोजाय अस लागते हे।” काहत अपन कुरिया म निंगिस। पाछू-पाछू पारबती गिस।
**
सूरज ह लक्ष्मी ल बइठा के खुरसुनी पहुँचाइस। घर म निंगिन दूनोंझन। काँह जी कमलकांत… सगा आवत हन जी कमल….हूँत करावत हाँसत-हाँसत सूरज किहिस। तभे लक्ष्मी के बड़े भवजी त्रिवेणी के नजर परिस। तुरते दू लोटा पानी धरे निकलिस। ताहन मँझली बहू भारती घलो देख डारिस। आइस; अउ लक्ष्मी के पाँव छुइस। सबझन लक्ष्मी ल देखिन। सब ला बड़ अचरज लागिस। फेर “हमर लक्ष्मी आगे ह… लक्ष्मी आगे…” काहत कुलकन लग गे। सबझन बइठक कुरिया म बइठिन। हाँसिन गोठियाइन। सूरज ले मिलके कमलकांत खुस होगे। थोड़ा-बहुत एती-ओती गोठ होइस; तहाँ फेर, ” ले मैं निकलत हँव जी अब तिहार-बार के दिन आय। मुँधियार तको होवत हे।” सूरज हर अपन घर निकलिस। संझा लछमी पूजा के तियारी करिन। पूजा-पाठ के होय ले सबझन के हाँसी-खुसी मेल-मिलाप होइन। लक्ष्मी ह सबझन ल रो-रोके अपन सरी बात ल बताइस। रात गहुँरान लागिस। सुतिन-बइठिन।
आधा रातकुन लेखिन ह गिरधारी ल हूँत कराइस- ” कमल के बाबूजी ! उठव तो थोरिक। लक्ष्मीकांत ह काबर तो हूँत करावत हे। जल्दी उठ तो; देख न काय बात ए।” गिरधारी ह तुरते उठिस।
” जातो तो लक्ष्मीकांत के माँ…। नेहा ल पीरा जनावत हे, तइसे लागथे। कतिक पान हे ते पता कर।” लक्ष्मीकांत करा ले गिरधारी आइस; अउ उत्ता-धुर्रा गोठियाइस। ताहन फेर लेखिन सब समझगे। नेहा के खोली म गिस। वोकर इस्थिती ल देखके कमलकांत ल उठाइस। ताहन नेहा ल गाँव ले लगे मुझगहन अस्पताल लेगिन। लेखिन अउ लक्ष्मीकांत दूनों महतारी-बेटा घला गिन।
**
इहाँ लक्ष्मी के ससुरार म गोबरधन पूजा के दिन बिहनिया छगन के बड़े बेटा मोहन ह मेमरी अउ सिलियारी धरे खेत ले आते भार कहिथे – “कउहा डोली के पूरा पानी निकलगे। खेत म हाथ धोयेक लाइक पानी नइ हे। धान कोनों इस्थीति म नी पकै। जय राम जी की होगे येसो वो खेत के। तभेच करण घलो अपन बात ल राखिस – “काली बजार ले आवत खानी मोर बेगसुद्धा पइसा रस्ता म गिरगे। दस-बारा हजार पइसा रहिस से। काली संझा मैं कोनों ल नी बतायेंव।” करण के बात ल सुनके सबझन मन उतरगे।
***
लक्ष्मी के ससुरार ले रिसाके आय मामला ल खुरसुनी भर के मन जान डारिन। सब जानत राहँय लक्ष्मी के ससरार के हालचाल ला। गोठियाँय कि बने करिस बिचारी आगे ते बाप-महतारी के कोरा मा। रहही बपुरी ह अपन लइका ल धरके मइके के देहरी मा। ससरार के तिपोय-आँके बेटी ह माय-मइके म तो जुड़ाथे। जब नंदिया के पुरा मुँड़ म चघ जाही तो बोहाबे; नहीं ते तउँर के निकलबे। कोनों गलत नी करे हे लछमी इहाँ आके। जान हे त जहान हे। लछमी के मइके खुरसुनी अवई ह सबला बने लागिस।
गोबरधन पूजा के दिन बिहनियाँ गिरधारी घर लक्ष्मी आइस; याने नेहा अउ लक्ष्मीकांत के अस्पताल म बेटी जनम धरिस। पारा-परोस के मन घलो जान डारिन। सब खुस होगें। सबके मोबाईल घनन-घनन करन लागिस। गिरधारी अउ लेखिन के घर-परवार म बधई के बरसा होवन लागिस। तभेच बड़े बेटा सूर्यकांत हर फोन करके बताइस कि टिकली गाय ह बछिया पिला जनमिस हे। सबला बड़ सुघर लागिस। अस्पताल म सपरिवार रिहिन। सबझन ओ. पी. डी. म खड़े राहैं। वोत्काटाईम कमलकांत अपन मोबाइल के मैसेज बॉक्स ल खोल के देखिस। अपन एकझन संगवारी के मैसेज ल पढ़के अबड़ खुस होगे। गिरधारी के पुछे ले वो बताइस- “बाबूजी, मैं पी. एस. सी. साक्छातकार म सलेक्सन होगेंव।” तभे नेहा हर लेखिन अउ लक्ष्मी ल बलाइस। पाछू-पाछू लक्ष्मीकांत घलोक आइस। कमलकांत अउ गिरधारी हर दुरिहा म खड़े रिहिन। नेहा हर अपन नवजात नोनी ल लक्ष्मी के कोरा म डारत मुस्काइस। कहिथे- “दीदी ! कालिच तोर आये ले हमर अंगना म मोर ये लक्ष्मी आइस। लक्ष्मी के आये ले लक्ष्मी आइस।” नेहा के गोठ ल सुनके सबझन एक-दूसर ल देखन लागिन। ससुरार ले मइके आय बेटी लक्ष्मी ल देखके सबझन के मेमरी कस हरियाय चेहरा म सुघर सिलियारी फूल फुलगे।