🌸 छत्तीसगढ़ राज्य स्थापना दिवस पर विशेष : डॉ. नीलकंठ देवांगन.

🌸 ” छत्तीसगढ़िया कोन ? “

तीन झन गोठियावत रिथें
पेलिके पेला होवत रिथें
एक झन किथे – ‘ ‘ मैं इहें जनम धरेंव
मोर नेरुवा इहें गड़े
मैं छत्तीसगढ़िया ‘
दूसर भुंकरथे –
‘का भईस, मैं इहां नइ रहंव
मोर जगा ‘ छत्तीसगढ़ निवासी ‘
परमाण पत्र हे
मैं छत्तीसगढ़िया ‘
तीसर गुर्राथे – ‘ मोर लरा जरा,
नता दिस्टा इहें रहिथें, मंत्री अउ नेता मन लाग मानी ये,
मैं छत्तीसगढ़िया ‘

बुढ़वा बबा कान लगाके सुनत रिथे
मने मन गुनत रिथे
आंखी ल रमजत, कान खजुवावत
बुदबुदाथे – ‘ अरे जानत हंव,
मैं तुंहर चाल ,
नवां छत्तीसगढ़ राज बने हे
नौकरी पाय बर हाथ पांव मारथव,
पांव जमाए खातिर
जुगत उदिम लगावथव,
अरे,तुम का जानव
माटी के महिमा
न जनम, न करम, न धरम, न भाखा
भुंकरे भर मं थोरे हो जहू
छत्तीसगढ़िया ‘

अउ सोगसोगावत कहिथे –
‘ माटी के गुन जउन गाथे,
धुर्रा ल तिलक लगाथे
ओला अपन महतारी,
अपन ल लइका मानथे
लोक परंपरा के जउन
करथे निरबाह,
पाथे इहें थिरबाह
ओखरे दुख मं दुख अउ
सुख मं सुख मनाथें
दया मया, पीरा पिरीत के बंधना मं बंधाय
लोक कला संस्कृति
जेखर रग रग मं समाय
परान दे बर जउन रिथे तियार
जान ले जादा जेखर माटी ले पियार
देह जेखर छत्तीसगढ़ माटी ले बने
अंग अंग जेखर चिखला माटी मं सने
उही छत्तीसगढ़िया
उही सिरतोन छत्तीसगढ़िया ‘

•डॉ.नीलकंठ देवांगन

•संपर्क –
•84355 52828

🌸🌸🌸🌸🌸🌸