विशेष : अक्ति तिहार : डॉ. नीलकंठ देवांगन

🌸 सौभाग्य जगाथे – अक्ति तिहार
– डॉ. नीलकंठ देवांगन
[ शिवधाम कोडिया, जिला – दुर्ग, छत्तीसगढ़ ]

छत्तीसगढ़ मं अकती के तिहार शुभ संकल्प भाव से मनाय जाथे | किसान मन खेती किसानी के काम इही दिन ले शुरू करथें | लोटा या बरतन मं पानी भरके ओमा लीम के पाना (छोटे डंगाली) बोरके ठाकुर देवता समेत गांव के सबो मान्य देवी देवता अउ मंदिर मं विराजित देवी देवता मन ल जल अर्पित कर( छिड़क के) आशीर्वाद लेके शुभ काम शुरू कर थें | अक्षय तृतीया ( अकती,अक्ती, आखा तीज) बैसाख महीना अंजोरी पाख के तीज के दिन आथे | ये दिन जवुन भी काम किये जाथे, सब सफल होथे, विघन बाधा ले दूर होथे, मन चाहा होथे, काम मं रुकावट नइ आवय | येला अबूझ मुहूरत माने जाथे | संस्कृत मं ‘ न क्षय: इति अक्षयः कहिथें | ‘ जिसका नाश नहीं होता वह अक्षय है | वइसे साल मं चार दिन अइसे हे जेमा शुभ काम करे खातिर लगन मुहूरत निकाले के जरूरत नइ पड़य | ये दिन हे- रथ यात्रा, गनेश चतुर्थी, राम नवमी, अक्षय तृतीया | येला मनोकामना के पूर्ति, सपना पूरा होय के, दुर्भाग्य ल सौभाग्य मं बदले के दिन केहे जाथे | जिनगी मं अटके काम बन जथे, सफलता के दुवार घलो खुल जथे | येखर सेती येला ‘सौभाग्य दिवस’ केहे जाथे |

शुभ काम करे के अच्छा दिन- ये दिन शुरू करे सब काम पूरन फलदायी होथे | शादी बिहाव बर तो ये दिन सबले अच्छा माने जाथे | सबले जादा बिहाव इही दिन होथे | ये दिन धार्मिक महत्व के संग व्यापारिक वैभव बढ़ाय के शुभ अवसर होथे | किसान मन इही दिन देवालय मं धान चढ़ाके धान बोय के शुरूआत करथें |

संपत्ति खरीदे के शुभ अवसर- ये दिन सोना खरीदना बहुत शुभ माने जाथे | सोना के बने गहना,जमीन जायदाद, मकान खरीदना, घर बनाना, नवा घर मं प्रवेश करना, पूजा पाठ करना आज के दिन उत्तम माने जाथे |

दान पुन्न के बड़ महत्व- ये दिन स्नान, दान पुन्न, जप होम के बड़ महत्व होथे | ये दिन के दिये दान पुन्न के नाश नइ होवय बल्कि मरे के बाद कई गुना बढ़ के मिलथे | जरूरत मंद मन ल जरूर दान देना चाही | बसंत ऋतु के बिदाई अउ गरमी के चढ़ती मं ये तिहार आथे | तेखर सेती गरमी ल शांत करइया चीज जादा दान देना चाही- कुल्हड़, सकोरा, छाता, पंखा, पहिरे ओढ़े के, खाय पिये के सामान | गाय, भूमि, सोना के दान शुभ माने जाथे | सबले जादा पुन्न कन्या दान के बयाय गे हे | कहूं बिहाव के लगन नइ मिलथे , त इही दिन बिहाव करके कन्या दान के महा पुन्न पा सकथें | गरीब कन्या के कन्यादान कर के खुद के बेटी के जिनगी ल सुख,समरिद्धि, खुशी से भरपूर कर सकथें |

सुख कामना के परब – ये दिन वरत पूजा करे ले जिनगी मं खुशहाली आथे | सब सुखी रहयं ,स्वस्थ रहयं, सबके कल्यान होवय अइसन भावना, कामना अउ परार्थना करे के परब आय | भिन्सरहा उठके नहा धो के मां लक्ष्मी अउ भगवान विष्णु के पूजा करे ले गृहस्थ जीवन मं समरिद्धि अउ खुशहाली आथे, धन धान्य के बढ़ोत्तरी होथे | शिव पार्वती के पूजा के भी खास महत्व हे | रोग शोक दुख दारिद भागथे, सुख शांति आथे |
ये दिन पुरखा मन ल तिल अर्पन करे ले उंखर आत्मा ल शांति मिलथे, किरपा बरसथे |

छत्तीसगढ़ बर खास- छत्तीसगढ़िया मन धरम करम मं जादा विश्वास करथें | देवी देवता ल मनाथें | हर परब तिहार ल लोक परंपरा के निरबाह करत श्रद्धा के साथ जुरमिल के मनाथें, निभाथें | इहू तिहार मं इही भाव दिखथे |

पुतरा पुतरी के बिहाव- ये दिन पुतरी पुतरा के ब्याह रचा के सबो नेंग-जोग बिधि बिधान ले करके बिहाव संस्कार ल समाज मं प्रवाहित करथें | लइका मन ये दिन बहुत खुश रथें | ये दिन के ओमन इंतजार करत रहिथें | पास पड़ोस के घर वाले मन ल बिहाव के नेवता देथें | सियान मन खास करके माई लोगिन मन आके टिकावन टिकथें |सुग्घर मड़वा सजा के खेले खेल मं घराती बराती के हिस्सा बनथें |

किसान मन इही दिन ले अपन खेती किसानी के काम मं मानसिक अउ शारिरिक रूप ले लग जथें | ये दिन के महत्व ल जनइया मन करसी मं पानी भर के ठंडा पानी पिये के शुरुआत इही दिन ले करथें | परशुराम के जनम इही दिन होय रिहिसे | ओखर जयंती घलो मनाथें |

•संपर्क –
•84355 52828

🌸🌸🌸