साहित्य : दुर्गा प्रसाद पारकर के भगीरथ प्रयास – आलेख, कमलेश शर्मा बाबू

छत्तीसगढ़ी भाखा बर अपन तन-मन-धन से सेवा करइया बेटा दुर्गा प्रसाद पारकर जी ल आज सबो जानथें |वो कोनो परिचय के मोहताज नइहे |बिलासा बाई केवट, बहू हाथ के पानी, इंदरु केवट, सिधवा झन समझव जइसे रचना के चरचा आय दिन होवत रिथे |प्रेमचंद जी के कई उपन्यास के वोमन छत्तीसगढ़ी अनुवाद घलो करे हें |चिन्हारी के संस्थापक दुर्गा प्रसाद पारकर जी ह छत्तीसगढ़ी भाखा साहित्य बर अपन चिंता ल समय-समय म प्रकट करत रिथें अउ पूरा समर्पित भावना ले येखर बर नवा-नवा उदीम करत रिथें |ऊखरे अथक प्रयास आय कि पं. रविशंकर शुक्ल विश्वविद्यालय म सन् 2013 ले 100 सीट के संग एम. ए. छत्तीसगढ़ी पाठ्यक्रम खुले रिहिसे |ऊखर सतत प्रयास रंग भी लइस अउ कतको लइका मन ये कोर्स म पोस्ट ग्रैजुएट के डिग्री प्राप्त करिन |फेर का फायदा ? वो लइका मन बेरोजगार घूँमत हें |येमा कोनो ल नौकरी नइ मिलत हे स्थिति तो आज अइसे आगे कि 100 सीट के साथ खुले ये पाठ्यक्रम 40 सीट म आगे |पारकर जी के चिंता के सबसे बड़े कारण इही रिहिस |जइसे कोनो माली अपन लगाय पेड़ ल ठाड़ सुखावत देखथे वोइसने हालत होगे रिहिस |जब वो 9 जुलाई 2023 के दिन स्वरूपानंद सरस्वती महाविद्यालय में अपन मन के पीरा ल उदगारत ये किहिस कि “जब मैं छत्तीसगढ़ी म एम. ए. करे ये बेरोजगार लइका मन ल देखथंव त मोला अइसे लगथे कि मैं पाठ्यक्रम खुलवा के कोई पाप तो नइ कर डरेंव ” ऊखर ये अल्हादित कर देवइया वचन सुन के पूरा हाल गमगीन होगे रिहिस अउ विद्यार्थी मन के आँखी नम होगे रिहिस |जब तक कोनो पाठ्यक्रम रोजगार मूलक नइ होही वोखर हश्र अइसने होही |
पारकर सर जी तो थकने वाला मनखे नोहय |वोखर सरलग प्रयास छत्तीसगढ़ी भाखा ल पोठ करे बर अनवरत जारी हे |वो दिन ल भला कोन भुला सकथे जब 10 मई 2013 के स्वामी स्वरूपानंद सरस्वती महाविद्यालय भिलाई म चिन्हारी साहित्य समिती के एक ऐतिहासिक कार्यक्रम होय रिहिस जिहाँ बड़े-बड़े साहित्यकार मन के गरिमामय उपस्थिति रिहिस |अउ इही आयोजन म छत्तीसगढ़ी पाठ्यक्रम बर अभूतपूर्व निर्णय ले गे रिहिस |प्राथमिक पाठशाला में छत्तीसगढ़ी पाठ्यक्रम के स्वरूप बर आदरणीय बलदाऊ राम साहू जी ल, माध्यमिक पाठशाला बर डाँ. जीवन यदु जी ल, उच्चतर माध्यमिक विद्यालय बर डाँ. विद्यावती चंद्राकार जी ल अउ एम. ए. छत्तीसगढ़ी पाठ्यक्रम बर डाँ. ब्यास नारायण दुबे जी ल विशेष रूप से आमंत्रित करके जवाबदारी दे गे रिहिस |ये कार्यक्रम में डाँ. सुरेन्द्र दुबे, डाँ. सरोज पाण्डेय, दानेश्वर शर्मा सहित छत्तीसगढ़ के अनेक साहित्यकार मन शामिल होय रिहिन |अउ खुशी के बात ये होइस कि इही आयोजन के बाद डाँ. ब्यास नारायण जी के प्रयास ले पं. रविशंकर विश्वविद्यालय म एम. ए. छत्तीसगढ़ी पाठ्यक्रम के शुरुवात होइस |
पारकर सर जी के भगीरथ प्रयास म 09 जुलाई 2023 के दिन सदा-सदा बर यादगार दिन रइही |ये दिन स्वामी स्वरूपानंद सरस्वती महाविद्यालय हुड़को भिलाई सेक्टर 6 म भब्य चिन्हारी सम्मान के आयोजन पारकर सर जी द्वारा करे गिस जिहाँ छत्तीसगढ़ के बड़े-बड़े विभूति मन के आगमन होइस |ये कार्यक्रम म विशेष अतिथि के रूप म संसदीय सचिव संस्कृति मंत्री श्री कुंवर निषाद जी छत्तीसगढ़ शासन, मुख्य अतिथि के रूप म पद्मश्री डाँ. ममता चंद्राकार कुलपति इंदिरा कला संगीत विवि. खैरागढ़, डाँ. भूपेन्द्र कुलदीप कुलसचिव हेमचंद विवि.दुर्ग, वक्ता के रूप में डाँ. राजेश श्रीवास अधिष्ठाता अध्ययन मंडल हिन्दी पं. रविशंकर विवि. रायपुर, डाँ. मृदुला सिंह अधिष्ठाता हिन्दी अध्ययन मंडल संत गहिरा गुरु विवि. सरगुजा, डाँ. डी एस ठाकुर अधिष्ठाता हिन्दी अध्ययन मंडल अटल बिहारी बाजपेयी विवि. बिलासपुर, डाँ. विद्यावती चंद्राकार अध्यक्ष राज्य शैक्षिक अनुसंधान परिषद रायपुर, डाँ. अभिनेष सुराना अधिष्ठाता हिन्दी अध्ययन मंडल हेमचंद विवि. दुर्ग,वरिष्ठ साहित्यकार श्री डुमन लाल ध्रुव जनसंपर्क अधिकारी धमतरी, सहित सीताराम साहू श्याम, डाँ. पीसी लाल यादव, कालेज के प्राचार्य डाँ. हंसा शुक्ला, रजनी रजक, पूनम विराट, छत्तीसगढ़ के अनेक जिला मन के साहित्यकार, कलमकार, विभिन्न विवि. के विद्यार्थी, शोधार्थी छात्र मन के भारी संख्या में उपस्थिति रिहिसे |ये भब्य कार्यक्रम में शिक्षाविद अउ साहित्यकार डाँ. दीनदयाल दिल्लीवार जी ल चिन्हारी साहित्य समिती भिलाई द्वारा वर्ष 2023 के चिन्हारी सम्मान ले सम्मानित करे गिस |
आदरणीय दुर्गा प्रसाद पारकर जी के छत्तीसगढ़ी साहित्य बर पोठ पहल अउ समरपन के हम सब साक्षी रेहेन |अउ इही ऐतिहासिक आयोजन म मुख्यमंत्री जी के नाम एक मांग- पत्र उमन संस्कृति मंत्री श्री कुंवर निषाद जी ल सउँपिन |साथे-साथ आये अतिथि मन से घलो ये मांग- पत्र बर समर्थन मांगिन |ये मांग- पत्र म प्रमुख मांग ये रिहिस-
1-छत्तीसगढ़ के सबो विश्वविद्यालय के सबो महाविद्यालय म एम. ए. छत्तीसगढ़ी के पाठ्यक्रम लागू हो |
2-कला स्नातक म एक विषय छत्तीसगढ़ी हो |
3-छत्तीसगढ़ी खातिर सबो सरकारी विभाग म वैकेन्सी निकाले जाय |
4-अँग्रेजी माध्यम के स्कूल म एक विषय दूसर प्रांत कस छत्तीसगढ़ी विषय के पढ़ाई होय |
5-छत्तीसगढ़ी आखिर आठवी अनुसूची म शामिल काबर नइ होवत हे, ओकर कारण खोज के निदान करे जाय |
6-छत्तीसगढ़ी ल यूजीसी से मान्यता देवा के सेट अउ नेट के परीक्षा ले बर काहय ताकि एम. ए. छत्तीसगढ़ी करके सेट अउ नेट के परीक्षा देवा के महाविद्यालय म प्राध्यापक बन सकयँ |
7-छत्तीसगढ़ी भाषा म पीएचडी के सुविधा होय |
8-महाविद्यालय म छत्तीसगढ़ी के प्रोफेसर बर वैकेन्सी निकाले जाय |सेट अउ नेट के छूट दिए जाय |
9- स्वामी आत्मानंद शासकीय उत्कृष्ट स्कूल कस छत्तीसगढ़ी माध्यम के उत्कृष्ट शासकीय स्कूल खोले जाय |जेमा हिन्दी अउ अंग्रेज़ी ल अविवार्य विषय के रूप म उच्च गुणवत्ता के संग पढ़ाय जाय |
10-स्वामी आत्मानंद शासकीय उत्कृष्ट अँग्रेज़ी माध्यम के स्कूल कस छत्तीसगढ़ी माध्यम के कालेज घलो खोले जाय |
बड़ खुशी-खुशी के साथ आदरणीय दुर्गा प्रसाद पारकर सर जी ह ये मांग पत्र ल 18 जुलाई 2023 के विधान सभा परिसर म संसदीय सचिव माननीय कुंवर निषाद जी अउ अपन प्रतिनिधि मंडल के संग सम्मानीय मुख्यमंत्री श्री भूपेश बघेल जी ल सउँपिन | 23 जुलाई 2023 के दिन मुख्यमंत्री बघेल जी ह रायपुर म युवा मन संग भेंट मुलाकात कार्यक्रम म छत्तीसगढ़ी बर वैकेन्सी निकाले के षोषणा करिस |माननीय मुख्यमंत्री द्वरा उखर मांग ल सहर्ष स्वीकार करिन तेखर सेती आभार प्रदर्शन करे बर 30 जुलाई 2023 के दिन श्री कुंवर निषाद जी के नेतृत्व म एम. ए. छत्तीसगढ़ी पाठ्यक्रम के विद्यार्थी मन संग पारकर सर जी ह सी एम हाउस जाके आभार प्रदर्शित करिन |
आदरणीय दुर्गा प्रसाद पारकर जी के ब्यक्तित्व अउ कृतित्व निरमल हे |छत्तीसगढ़ के पहिचान ल बचाय बर छत्तीसगढ़ी भाखा ल पोठ करे बर, छत्तीसगढ़िया मन के स्वाभिमान ल देखत येखर संरक्षण अउ संवर्धन बिक्कट जरूरी हे |आदरणीय दुर्गा प्रसाद पारकर जी ल वोखर ये योगदान बर पं. रविशंकर शुक्ल विश्वविद्यालय ह एम. ए छत्तीसगढ़ी के प्रवर्तक के रूप म प्रमाण पत्र दे के सम्मानित करे हे |
माननीय मुख्यमंत्री श्री भूपेश बघेल जी ह जेन सहृदयता से ये मांग ल स्वीकार करके तत्काल येखर बर समर्पित भावना ले जुट गे हे, ये हमेशा छत्तीसगढ़ के इतिहास म सुनहरा अक्षर म लिखे जाही |
पारकर जी के ये सेतु बंध म शर्माबाबू ह घलो एक चिटरा के रूप म अपन योगदान हमेशा देवत रिही |

[ आलेख अउ संकलन कमलेश प्रसाद शर्मा बाबू, कटंगी – गंडई, जिला – केसीजी, छत्तीसगढ़ •संपर्क : 99775 33375]

🟥🟥🟥