बाल गीत : दुर्गा प्रसाद पारकर [ भिलाई छत्तीसगढ़ ]

🟥
चना होरा

हरियर हरियर दिखय खेत खार ह
फर म झूले रहिथे चना के डार ह

गदेली चना ल हम्मन भूंजथन
इही ल हम्मन चना होरा कहिथन

चना होरा सब ल बिक्कट सुहाथे
खाए के बखत मुंह हाथ करियाथे

सब झिन मिल के चना होरा खाहू
होरा नइ खाहू ते बिक्कट पछताहू

🟥
बटकर

लाख के फर ह पोक्काथे
टोर टोर के घर म सब लाथे

घर म लानके फर ल नीछथे
फर नीछे ले बीजा निकलथे

इही बीजा ह बटकर कहाथे
भाटा संग बटकर गजब सुहाथे

बटकर के रहिथे सब ल अगोरा
बटकर ह खावन भाथे मोला

🟥
जाड़

हु हु जाड़ ह आ गे
हाथ गोड़ ह कांपन लागे

भूर्री म हाथ ल सेकन लागे
कथरी ल सब ओढ़न लागे

मुड़ी म कनटोपा पहिरय
सुड़ुक सुड़ुक नाक ह करय

बादर म भारी कोहरा ह छाथे
जाड़ बढइया हे कहिके चेताथे

🟥
बिहनिया

होवत बिहनिया सुरूज उए
चिरई चिरगुन चींव चींव करे

चारो कोती होवय अँजोर
चहल पहल करे गली खोर

गरूवा मन खइरखा म आवय
पनिहारिन मन ह पानी लावय

सब झिन बूता म भीड़ जाथे
मेहनत करके पसीना चुचवाथे

•••••

•संपर्क-
•79995 16642

🟥🟥🟥🟥🟥🟥