होली पर विशेष- डॉ. पीसी लाल यादव

●आगे होरी तिहार संगवारी

-डॉ. पीसी लाल यादव
[ गंडई-छत्तीसगढ़]

आगे होरी तिहार संगवारी ।
मारो भर- भर रंग पिचकारी।।

गोरी के गाल दिखे चिक्कन सुग्घर।
गुलाल लगा के करव अउ उज्जर।।
जस राधा बर दऊँड़े बनवारी।
आगे होरी तिहार संगवारी ।।

बड़े भईया मनमाने गुलाल म बोथाय हे।
डरपोकनी भऊजी कुरिया म लुकाय हे।।
मीठ लगय पिरीत म गारी।
आगे होरी तिहार संगवारी ।।

चौंरा- चौंरा म धिड़कत हवय नंगारा ।
लईका सियान सब नाचें पारा-पारा।।
गाँव लगे मया के फुलवारी।
आगे होरी तिहार संगवारी ।।

■■■ ■■■