■लिमवा के पेड़वा हावे जुड़वासा विशेष : अशोक पटेल ‘आशु’ [शिवरीनारायण छत्तीसगढ़]

लिमवा के  पेड़वा हावे  हरियर-हरियर
जेखर  छईहा  लागे ओ  सुग्घर-सुग्घर।
जिन्हा  बिराजे हावे  देवी  दाई शीतला
माथ ल  नवावा मैं हर  तोरे चरण  ला।।

आसिस  देबे ओ दाई  अपन भगत ला
अँचरा  के छईहा  दे दे  इही जगत  ला।
तोर  बिना  सुन्ना हावे मन के  मन्दिरवा
रद्दा  निहारय ओ  दाई तोरेच  दुलरुवा।।

लिमवा  के पेड़वा  म  तही बिराजे दाई
जुड़-जुड़  छइहा म तय ह समाए  दाई।
दुख-पीरा  तय हरथस तन  के तपन ल
सुख  ल  भर देथस तय हरके अगन ल।।

तोरेच सवारी  ओ दाई गदहा हर बने हे
पिठवा  म  बइठे तय हर सुग्घर लागे हे।
चारे  भुजा  म तोरे चारे हथेली ओ दाई
एक ठन हाथे दाई मंगल कलसा सजे हे।।

दूसर  हाथे  म  सूपा तय हर धारे  दाई
तीसर म धारे  तय  हर  बहिरी ल दाई।
चउथे म डारा लिमवा  ल धारे तय हर
भक्तन के करथस दाई तय हर भलाई।।

चेचक माता ओ दाई  तही कहाये  ओ
जुड़ शीतला दाई  तय हर  कहाये  ओ।
तेल हरदी म तय हर शांति कराए दाई
अषाड़ मास तय जुड़वासा  कराए ओ।।

■संपर्क-
■98278 74578

◆◆◆ ◆◆◆ ◆◆◆