बाल गीत : दुर्गा प्रसाद पारकर

🟥
ढेखरा

बारी बखरी म कोहड़ा सेमी लगा ले
नार के चढ़े बर बने ढेखरा गड़िया ले

ढेकरा के परसादे नार ह उपर चढ़थे
दिन दूनी रात चौगुनी नार ह बढ़थे

छानी म चढके कोहड़ा ह बिक्कट फरथे
फर ल देख कें लार ह टपके बर धरथे

नार बर ढेखरा ह पंदोली के बूता करथे
पंदोली पाके नार ह बिक्कट ससलथे

🟥
गोबर

गोबर दे बछरू गोबर दे
घर दुवार ल लीपन दे

गोबर ले छेना थापबोन
छेना ल चुल्हा म बारबोन

गोबर ले खातू बनाबोन
मनमाड़े फसल उपजाबोन

गोबर ले गोबर गैस बनाबोन
बिजली के खपत बचाबोन

🟥
कलिन्दर

उपर ले करिया अउ भीतर ले लाल
बड़े बड़े कलिन्दर जइसे फूटबाल

कलिन्दर ल चानी चानी करके खा
खाए के बखत बीजा ल थूकत जा

दांत नइ हे तभो ले चबलावत जा
पानी अउ नाश्ता संघरा खावत जा

गर्मी म कलिन्दर बिक्कट सुहाथे
कलिन्दर खाए ले तन ह हरियाथे

🟥
खपरा छानी

माटी के लोंदी ल हकन के सान ले
लोंदी ला धर के सांचा म ढाल ले

ढले के बाद रउनिया म सुखो ले
सुखा के आवा म कस के पको ले

पके के बाद खपरा ह होथे तइयार
अब छानी ल छाए बर कर बिचार

घर छवाए ले हमर घर ह बन जथे
जीनगी भर के सपना ह पूरा होथे

🟥
चंदाही

चंदा कस चंदाही रहिथे
फूलकांच के बने रहिथे

चंदाही ल कहिथन थारी
लोटा ह ओकर संगवारी

चंदाही म भात पोरसथे
दार संग सान के खाथे

दार भात संग साग खा ले
चटनी के सुवाद ल पा ले

चंदाही लोटा म पाँव पखार
पीयत जा पंचामृत के धार

•••••

√ संपर्क-
√ 79995 16642

▪️▪️▪️▪️▪️▪️