बाल गीत : दुर्गा प्रसाद पारकर [ भिलाई-छत्तीसगढ़ ]

🟥
फरा

कनकी पिसान म नून डार के
कस के सान ले पानी डार के

दुनो हाथ म तैं ओला बर ले
बर बर के एक जघा कर ले

कराही म फल्ली तेल डार के
जीरा ,तिली के फोरन डार दे

फरा ल तँय कराही म डार दे
साग कस तँय फरा बघार दे

लहुटा दे तँय जरे झन कहिके
लागत हे फरा अब चुरगे तइसे

धनिया बंगाला के चटनी बना ले
चटनी संग फरा ल तँय ह खा ले

🟥
अड़गसनी

अड़गसनी खातिर बांस तैं छाट ले
जरूरत के लइक बांस ल काट ले

दुनो मुड़ा म कस के डोरी बांध दे
एकर बाद ओला मियार म टांग दे

अब होगे संगी अड़गसनी तइयार
अड़गसनी सहिथे कपड़ा के भार

हर घर म अड़गसनी जरूर रहिथे
सब झिन के कपड़ा टंगाए रहिथे

🟥
लोचनी

कारीगीर ह लोहा ल भट्ठी म धंसाथे
लाल लाल लोहा ल संगसी म फंसाथे

संगसी म धरके संगी हथौड़ी म पीटथे
हथौड़ी म पीट के लोहा ल लमियाथे

दुनो डाहर के छोर ल चोक्खी बनाथे
बीच ले मोड़े के बाद लोचनी कहाथे

कांटा ल हेरे बर लोचनी ह काम आथे
कांटा निकले के बाद तन ह सुख पाथे

🟥
सुवा

मसुर दार कस दिखथे तोर आँखी
हरियर हरियर दिखथे तोर पाँखी

टपट कुरू रे टपट कुरू कहिथस
मीठ बोलत तै पींजरा म रहिथस

पानी दे दे सगा आ हे वो कहिथस
सगा ल गोड़ धोए बर तैं कहिथस

मया पीरा बर सुवा हमर संगवारी
सुख दुख ल गोठियाथे घर के नारी

•••••

•संपर्क-
•79995 16642

▪️▪️▪️▪️▪️▪️▪️▪️▪️▪️▪️▪️