🏀 हरियाली पर्व पर विशेष : ‘ मन हरिया जथे – हरेली तिहार म ‘

🏀 हरेली

छत्तीसगढ़ तीज तिहार के प्रदेश आय | इहां बारों महीना परब तिहार के रिमझिम होवत रथे | रंग बिरंगी संस्कृति परंपरा सब तिहार ल रंगीन बना देथे | ये ह धार्मिक परंपरा अउ लोक परब के अनूठा राज्य हे | हर तिहार मनाय के पीछे कोनो न कोनो कारन या तथ्य होथे जउन मं निहित संदेश समाय रहिथे | हरेली के तिहार मं इहां के निवासी किसान मन अपन जिनगी मं हरियाली खुशहाली के कामना करत पूजा पाठ करथें |

कृषि औजार के पूजा पाठ – मानसून आय के बाद सावन अमावस्या मं ये तिहार मनाय जाथे | किसान मन अपन खेती किसानी के औजार – नांगर, कोपर, रापा, गैंती, कुदारी, हंसिया,टंगिया ल धो मांज के साफ सुथरा पूजा स्थान मं रखथें | घर मालकिन जम्मो उपकरन मं आटा के घोल से हाथा दे चंदन बंदन लगाथें | घर के मुखिया ,फूल पान, होम धूप दे चीला गुड़ के भोग लगा नरियर फोड़ के भगवान ले सुख समृद्धि के कामना करत पूजा पाठ करथें | घर मं तेलहा रोटी पिठा पकवान बनथे |

पशु धन के पूजा – कृषि उपकरन के पूजा के संग पशु धन – गाय, बइला, बछरू, भैंसी,भैंसा के आदर के साथ पूजा करथें | इंद्रदेव के स्मरन कर थें |छत्तीसगढ़ धान के कटोरा कहलातथे | खेती किसानी के काम मं जेखर ले प्रत्यक्ष अप्रत्यक्ष सहायता मिले रिथे, तिंखर प्रति आभार जताथें |

गोधन किसान के ताकत होथे – गोधन किसान मन बर बड़ उपयोगी होथे | ओखर ताकत, संगवारी होथे | तेखर सेती ये दिन उंखर सुरक्षा खातिर खास उदिम करथें | माटी के परई मं सिंदूर ले अर्जुन के बारा नाम ( अर्जुन, पार्थ, फाल्गुन, विष्णु, कौन्तेय, पार्थ- सारथी, विजय, धनंजय, कपिध्वज, सत्यसाची, गुडाकेश, श्वेतवाहन ) लिखके नारियल संग टांगथें | ये दिन किसान मन अपन बइला भैंसा के सिंग अउ खुर ल धो पोंछ के तेल लगा थें, सिंगारथें |

गेंड़ी – हरेली तिहार मं लइका मन काफी खुश दिखथें काबर के ओ मन ल गेंड़ी चढ़े ल मिलथे | गेंड़ी बांस के बने खिलौना होथे | येखर उंचाई 3 से 7 फुट तक होथे | जमीन से एक दू फुट के ऊंचाई मं बांस के बने खपच्चा के पायदान होथे | जेला बूच बरही या जूट के रस्सी से बांध के बनाय जाथे | येमा मिट्टी तेल या अरंड तेल डार देथें जेखर ले गेंड़ी चढ़के चले, दौड़े के बेरा रुंच रुंच आवाज आवय | गेंड़ी चढ़े मं अभ्यास जरूरी हे | संतुलन बनाय ल लगथे | कई झन मन ऊंच गेंड़ी चढ़थें | गाना घलो गाथें –
‘ गेंड़ी रे गेंड़ी बछर भर के गेंड़ी
आज मना लन जी भर के हरेली ‘

गांव बनाना – रात मं गांव के बैगा कुछ लोगन मन संग गांव के मेड़ो मं जाके पूजा पाठ करथे जेन ल गांव बनाना केहे जाथे | येखर ले अनिष्टकारी शक्ति से गांव ह सुरक्षित रहिथे | सुख शांति रथे, बिघन बाधा ले बचे रहिथे |

जादू टोना टोटका ले बचाव – ये दिन गाय चरइया राउत, ठेठवार, पहाटिया अपन किसान मालिक के घर दरवाजा मं लीम या महुआ के पत्ता डंगाली खोंचथें जेखर से जादू टोना टोटका ले घर के रक्षा हो सकय |लीम के पाना बीमारी नुकसान करइया कीट पतंग से घलो रक्षा करथे |

भूत प्रेत पिशाच बाधा ले बचाव – ये दिन लोहार मन अपन मालिक के मुख्य दरवाजा मं लोहा के खीला ठोंकथें जेखर ले भूत प्रेत पिशाच बाधा ले घर सुरक्षित रहय | पौनी पोसारी मन ये दिन मालिक के घर अपन फरज निभाथें | बदला मं किसान ओ मन ल दार चांउर नून पैसा देके उंखर सम्मान करथें |

हरेली के बिहान दिन ले गाय चरइया राउत पहाटिया मन लाठी धरथें यानी पशु चराय के काम शुरू करथें |

ये वो समय होथे जब किसान मन धान के बुआई आदि करके फुरसत मं रहिथें | खेत मं बढ़त पौधा ल देख के मन उंखर आगर रथे | ओ मन प्रकृति मं हरियाली के चादर ओढ़े ये धरती के सिंगार हरेली तिहार के माध्यम ले करथें, अपन प्रसन्नता ल व्यक्त करथें | सावन अमावस्या मं ये तिहार परथे | अमा माने अंधकार भरे रात अउ वस्या माने बसइया जउन ल शक्ति किथें |
येखरे सेती शुभ गुन कर्म ल आचरन मं लाय खातिर शक्ति के पूजा करथें | ये तिहार ह अंधकार ले प्रकाश मारग मं जाय के संदेश घलो देथे |

०लेखक संपर्क –
०84355 52828

००००० ०००००