🟠 छत्तीसगढ़ के लोक परब ‘ पोरा ‘ : गाय गरु बईला मन के आभार के प्रतीक : अशोक पटेल ‘ आशु ‘

4 years ago

438

हमर देश हर एक कृषि प्रधान देश आय। जिहां ला बारह मासी कछू न कछु
किसम के दलहन–तिलहन आऊ धान के फसल लगाए जाथे। ए सब्बो फसल लगाय म हमर पोसे गाय–गरू–बईला के विशेष योगदान होथे। ए मन के बिना हमर कोनो खेती–किसानी के कारज नई होवय।आऊ
इही कारण से हमर देश म विशेष करके छत्तीसगढ़ म हमर किसान भाई मन अपन बाहन–बईला के आभार माने खातिर पोरा के परब मनाथें।
पोरा के परब हर हमर बाहन–बइला मन ल
समर्पित रहिथे। ए दिन गाय–गरू–बइला मन के विशेष पूजा अर्चना करे जाथे।
छत्तीसगढ़ के लोक परंपरा के प्रमुख
परब पोरा ल इहां अड़बड़ उमंग,उत्साह आऊ धूमधाम के साथ मनाए जाथे।
एकर कारण भी हावय,ओ कारण एहर
आय की हमर किसान भाई मन के धान हर
इही पोरा के दिन गरभ धारण करथे। तभे
तो ए धान हर सुघर नवा–नवरिया बहुरिया कस लागथे।जेमा हमर बाहन–बइला मन के विशेष योगदान रहिथे।
“पोरा”अर्थात “पोला” के परब ला
भादो मास के अमावस्या के दिन मनाए जाथे। ए दिन हमर किसान भाई मन
विशेष करके बईला ल
नऊहा–धोवा के अड़बड़ सजाथें।फेर ऊकर पूजा करथें। ए परब के दिन किसानिन दाई मन बरा,गुरहा सोहांरी बनाके घर म माटी के बईला म भोग लगाथें।अपन बाहन–बईला ला घलो खवाथें।फेर ओला घर–भर परसाद के रूप म बांट खाथें।
ए परब के नाम हर “पोला” काबर परिस,आऊ “पोला” काबर मनाए जाथे,
एकर पाछु म एक ठन विशेष कारण रिस हे।
दुवापर जुग म जब भगवान नारायण विष्णु हर कृष्ण रूप लेके धरती मा जनम लिन ता आठे कनहईया मनाय गिस। आऊ तब से लेकर उकर ममा कंस हर ओला मारे खातिर पाछु परे रहिस। ए बेरा म जब कृष्ण हर नानकुन रिस ता बासुदेव जसोदा तीर म
रहय। अईसन बेरा म उकर ममा कंस हर
कईओ बार राक्षस मन ला मारे बर पाठोईस
पर कोनो मार नई सकिन।तब एक दिन कंस हर “पोलासुर” नाम के एक झन राक्षस ला भेजिस। जेला नानकन कृष्ण हर लीला करत–करत मार दारिस।
जेला देख के सब्बो
अचंभित हो गिन।ए हर उही भादो मास के अमावस्या के दिन रिस हे। एकर सेती ए दिन ल पोला परब के नाम ले जाने गिस।
हमर छत्तीसगढ म पोरा के विशेष महत्व
होथे, ए परब म हमर बईला मन के पूजा
होथे। इही मन के पाछु मा खेती किसानी के कारज़ होथे।जेकर से हमर किसान मन ला आर्थिक लाभ होथे।
आऊ एकरे सेती ये परब मा हमर किसान मन अपन बाहन–बइला ल आभार देहे खातिर ऊमन पूजा अर्चना करथें।ताकि उकर घर परिवार म सदा आशीर्वाद बने रहय।
ए परब के बेरा म किसान मन अपन
बइला के पूजा करथें अऊ किसाननीन दाई मन माटी के बइला के पूजा करथें।पूजा करे के बाद इही बइला ल नान्हे–नान्हे लइका मन खिलौना बना के खेलथें। ए हर आय हमर छत्तीसगढ के लोक परब “पोरा”।जेमा धरम–करम,आस्था–विश्वास आऊ संस्कृति के झलक ह दिखथे।