🌸 विमोचन : ‘ छंद फुलवारी ‘ – कृति शुचि ‘ भवि ‘ – समीक्षा डॉ. संध्या रानी शुक्ला

4 years ago

268

छत्तीसगढ़ी भाखा के जम्मों पढ़इया लिखइया साहित्यकार मन ल शुचि’भवि’ जी के छन्द फुलवारी काव्य संग्रह के अगोरा हावय। काव्य संग्रह ल शुरू ले लेके आखिरी (छेवर) तक पढ़े ले मोला पूरा पता चलत हावय कि इँकर सृजनशीलता,कल्पना शक्ति ,सहज सरल अभिव्यक्ति ,छत्तीसगढ़ी के प्रति बरोबर न्याय करत हावय ।

शुचि’भवि’ जी हिंदी भाषी आय तभो ले ओला छत्तीसगढ़ी मा छन्द रचना कर के इच्छा रहिस अउ वोमन प्रयास करिन अउ अपन प्रयास म बरोबर सफल होय हावय। इँकर छंद रचना हर गजब सराहनीय हावय अपन आप ल खुद ल कहत हावय-
छन्नपकैया छन्नपकैया, टीका चन्दन रोली।
तहूं सीख जाबे एक दिन, छत्तीसगढ़ी बोली।।
शुचि’भवि’ जी मन सबले पहिली, छन्द रचना करे बर सिखिन अउ अपन कार्य में सफल रिहिन ।ये काम हर उँकर बर चुनौती ले कम नई रिहिस होही, फेर उन सफल होइन।
छन्नपकैया , दोहा, माहिया, कज्जल छन्द, कुकुभ छन्द, सार छंद, कुण्डलिया छन्द, सरसी छन्द, बरवै छन्द, अमृतध्वनि छंद, मंदारमाला सवैया, सुमुखी सवैया, विष्णुपद छंद, आल्हा छन्द, चौपाई छन्द जम्मों छन्द ल लिखे मा सफल होय हावय।

इँकर छंद मा छत्तीसगढ़ के जम्मो प्रकार के पेड़, रुख-राई, जम्मो किसम के फल, किसम-किसम के व्यंजन (रोटी पीठा ), इंहाँ के रहवैया सबो जाति, आने-आने धरम के मनइया, लोग लोगन, जम्मो नदिया, रिकम-रिकम के धान के प्रजाति, दर्शनीय स्थान, नाना प्रकार के गीत, नाचाह, कई प्रकार के वाद्य यंत्र, रिकम-रिकम के गहना-गूठा, इंहा के खनिज पदार्थ, आज़ादी बर लड़ईया, प्राण देवैया देशभक्त, इहाँ के रीति-रिवाज, पहनावा,(कपड़ा ओन्हा) वेशभूषा , आने- आने सांस्कृतिक धरोहर के विषय म छंद रचना करे हावय,जौन सुग्घर बने हावय। बारिस के अंगोरा सुग्घर नान-नान जीव जन्तु मन कइसे करत हावय तेरे बरनन ल देखव –
छन्नपकैया छन्नपकैया, मेचका झेंगुरा गावय।
किसिम-किसिम के राग ल गाके, बारिस सबो बुलावय।।

हिंसा झन करव ये बात ल दोहा म सुग्घर लिखे हावय-
शान तिरंगा के रखव, करव करम जी नेक।
नफरत ल भूलव सबो,हिंसा ला दव फेक ।।
सिंह के खाल मा सियार मन कैसे लुकाय रहिथे तेकर बरनन देखव –
नारी ल नोंचत सबो, पहिर हिरन के खाल।
अइसन मनखे ले बचव,समझव ओकर चाल।।
ईमानदारी ह कैसे कोंटा मा रोवत हावय,येकर बरनन ल देखव-
घर के कोन्टा मा परे, रोवत हे ईमान।
देखव तो कतका गिरे, कलजुग के इंसान।।

बसंत ऋतु अउ फागुन म जम्मो फूल धरती के सिंगार करथे तेकर सुग्घर चित्रण –
गेंदा गुडहल केतकी, सँग मा हे कचनार।
फागुन मा परसा फूलय, करय घरा श्रृंगार।।
पर्यावरण के चिंता करत कवयित्री के छन्द ल देखव-
हवय हमर जंगल इहाँ, जिनगी के आधार।
काट काट के झन करव,अतका अत्याचार।।
लुगरा के महता ल बतावत हें तेन सुग्घर पंक्ति के आनंद लव-
राखव नारी अपन मान, लुगरा तुंहर हे पहिचान ।
ढंके तन ह गुण के खान, फैशन हर लेथे परान ।।
कन्हैया उपर लिखे कुकुभ छन्द ल देखव-
बंसीवाला रास रचईया, मुकुट मोर के हे पाँखी।
राधा कान्हा कान्हा कहिके खोजत हे आंखी आँखी।।
दाई ददा मन पहिली गुरु आय, भगवान आय, दाई शक्ति स्वरूपा अऊ ददा हर देवता आय कुण्डलिया छन्द मा सुग्घर वरनन –
दाई ला कर पैलगी, पहली गुरु तय जान ।
अपन ददा ला मान दे, दुनो आय भगवान।।
दुनो आय भगवान, दया के सागर होथे।
इनला माथ नवाव, हमर दुख मा इन रोथें।
निसदिन रहिथे सँग, सबो झन सुनलव भाई ।
ददा देव के रूप, शक्तिरूपा हे दाई।

अमृत ध्वनि छंद म कवयित्री के रचना ल देखव गजब सुग्घर बने हावय जेमा कवयित्री बतावत हावय छतीसगढ़ के मनखे जुरमिल के रहिथें।हिंदू मुस्लिम, सिक्ख, ईसाई जम्मो झन हन भाई- भाई ये भावना लेके सुग्घर छंद रचना करे हावय तेकर आनंद लव-
चलव मनाबो मिल सबो आये हावय ईद।
सबो धरम मनखे हवय करबो सुग्घर दीद।।
करबो सुग्घर दीद सबो झन खुशी मनाबो।
अलग-अलग नई एके हन सब इहाँ बताबो ।
आज सेवई घर-घर बांटव, मिलके खाबो ।
ईद आय हे, हिंदू-मुस्लिम, चलव मनाबो ।
शुचि’भवि’ जी के छंद फुलवारी ह जम्मो
साहित्यानुरागी मन ला जरूर पसंद आही शुचि जी मन हिंदी के पोठ रचनाकार आय। शिक्षकीय कार्य में ब्यस्त होय के बाद घलो उँकर भीतर काव्य रस के सरलग धारा बोहावत रहिथे। गुरतुर-गुरतुर छत्तीसगढ़ी कविता के सुवाद ल उँकर छन्द फुलवारी मा पाहव तहाँ उँकर तपस्या पूरा हो जाही। कविता के संदेश हर चारो मुड़ा बगर के छत्तीसगढ़ी के मान ल बढ़ाही अइसे मोला पूरा विश्वास हवे।
छंद फुलवारी के जम्मों रचना ह शुचि’भवि’ जी के मानवीय संवेदना आय, जौन हर छत्तीसगढ़ी काव्यधारा बर उँकर समरपण ह कविता के माध्यम ले मानवीय संवेदना के सहज अभिव्यक्ति के जियत जागत उदाहरण बनही। छत्तीसगढ़ी शब्द उँकर रचना मा एक नवा अरथ लेके छत्तीसगढ़ी भाखा के शब्द साहित्य ल एक नवा लालित्य म सजाही । शुचि’भवि’ जी के रचनाधर्मिता ल साहित्य जगत में ऊँच जघा मिलही। इन्कर रचना छत्तीसगढ़ी साहित्य के श्री वृद्धि मा जरूर जघा बनाही, काबर की रचना म बने गहराई हावय।
शब्द चयन के ऊँचाई कल्पना अउ यथार्थ के मजबूती घलो देख बर मिलही। ये “छन्द फुलवारी” हर सही मायने मा छत्तीसगढ़ी भाखा के जम्मों पीरितिया मनबर अनमोल धरोहर बनही |काबर की भाखा के प्रति चेतलग रहिके अपन भाव ल पोठ रखें म सफल होय हें। मैं शुचि’भवि’ जी ल “छंद फुलवारी” के लेखन तेकर पाछू प्रकाशन खातिर गाड़ा- गाड़ा बधाई देवत हँव।
मोला पूरा परतित हे जेन्हर ये किताब ल पढ़ही ओहर अपन संगी-साथी,जहुंरिया, हित पिरित कर गोठियाय बतराय बिना नई रहही।