💞 कहिनी : डॉ. दीक्षा चौबे.

▪️ महतारी

साँझ कुन अपन साग-भाजी के ठेला ल धर के रमौतीन हर अपन घर तीर हबरिस त अब्बड़ झन मनखे सकलाय रहय । खमखमाय भीड़ ल देखिस त ओहर बग्या गे…ये हमर राज म झगरा-झंझट देखे बर सब्बो झन ठलहा बइठे हे , भईगे कोनो ल ऊंच आवाज म लड़त सुनीन त जम्मो बाहिर म ठाड़ के अपन कान ल तान के सुने लागथे । अपन घर के छेदा म हंडिया तोप ही अउ दूसर के छेदा म अंगरी खु सेर के देखहिं ।बड़ बेकार मनखे हे एमन । काय होगे जी अतेक भीड़ काबर माते हे बरदी बरोबर । फुलेरा के घर भीतरी जम्मो झाँक-झाँक मुँहू तोप त आव य त रमौतीन के जीवरा हर धकधक करे लागिस । कहूँ ओ मंदहा हर मार त नई डारिस अपन गोसईन ल । बपरी के जी ल हलकान कर डारथे ।
फुलेरा हर सब्जी के ठेला धर के गली-गली घूम फिर के कइसनहो कर के दुनो लइका मन ल पालत-पोसत हे । ओखर गोसइया संतु रिक्शा चलावत रिहिस । खाय-पिये के लाईक कमा लिहि कइके फुलेरा के दाई हर ओला बिहा दिस । तीन झन लइका के गाड़ी ल तिरत-तिरत फुलेरा के ददा के साँस खियागे । बीड़ी अउ तमाखू हर ओखर फेफड़ा ल कमजोर कर दिस । दमा के बीमारी होगे अउ खाँसत-खाँसत एक दिन ओखर दम निकरगे । बपरी दाई हर बर्तन-बासा करके कइसनहो तीनों टुरी मन के बिहाव करीस । जौन मिलगे खाये-पिये के पुर्ति तहां अपन-अपन किस्मत । जेखर भाग म जतना लिखाये होही ओतना ओहर पाहि । शुरू-शुरू म बने रहिन घुमिन फिरीन तहां चालू होगे ओखर पियाई खवाई । दारू हर बने-बने घर ल बिगार देथे , ओहा मनखे के सोचे बिचारे के सक्ति ल खतम कर देथे । नशा म ओहर का कर डारथे खुदे नई जानय तभे त सुअर बरोबर कभू नाली म अउ कभू सड़क म ढलगे रहिथे । लाज-शरम ल बेच खाथे , दस रुपया बर मार-काट मचा देथें ।
हमर छत्तीसगढ़ म त मंदहा मन अतलंग करत हें , घरवाली मन हर हाड़गोड़ टोर के कमावत हे अउ घर के मालिक हर अपन जम्मो कमाई ल खाली दारू म उड़ावत हे । औरत मन गजब के जंगरहिन आय , घर के लक्ष्मी आय । उमन घर-गिरहस्ती के गाड़ी ल तीर के पार लगाथें नहिं त लइका सियान के मरना रहितिस ।
डउका मन ल सोझे रंग-रंग के खाय भर मिल जाय अउ कुछु जिनिस ले उमन ल मतलब नइहे । कइसे घर के गाड़ी हर खिंचावत हे , ओनहा , साग-तेल के खरचा घरवाली कती ले पुरोवत हे ए हर उमन के मतलब के नोहय । संतु अउ फुलेरा के घलो उही रामकहानी हे । संतु थोर बहुत रिक्शा चला के रुपया पाथे ओला दारू म उड़ा देथे अउ फुलेरा हर साग बेच के थोर-बहुत कमाथे उहु ल झटक लेथे भइगे इही बात म दुनो के बीच रोज महाभारत होथे । पहिली खाली बातचीत बंद होवय , अनबोला रहय तभो बने रिहिस तहर उखर झगड़ा हर मारपीट म उतर गे । पति-पत्नी के परेम हर फुलेरा के गारी रोगहा-भड़वा म उतर गे ।
दारू हर उंखर जिनगी म जहर घोर दिस । फुलेरा हर जब तक लइका नई होय रिहिस तब तक सही लेत रिहिस फेर रानी अउ राजू दुनो लइका के आय ले ओखर जिनगी बदलगे । महतारी के मया के आघु त भगवान घलो मुड़ी नवाथे । माँ बने के बाद औरत के अपन सुख कुछु नई रहय ओखर सब्बो सुख के आधार ओखर लइका हर बन जाथे । आखरी सांस तक ओहर अपन लइका के भला सोचथे ।फुलेरा हर लइका मन के होय ल अउ मिहनत करे लगिस , उंखर जतन ,पढ़ई लिखई बर ओहर अब्बड़ सोचय । कइसनहो कर के दुनो लइका ल पढ़ा देतेव त उमन के जिनगी बन जतीस ओहर अतके सोचय । फेर संतु हर पी खा के ओखर जम्मो मिहनत म पानी डार दय । फुलेरा हर अपन मितानिन तीर सुनता कर के बैंक म अपन खाता खुलवा ले रिहिस अउ ओमा थोर-थोर रुपया जमा करत गीस । लोग-लइका मन के घलो शौक रहिथे , धीरे-धीरे टी.वी. , अलमारी , बइठे बर कुर्सी बिसा डारिस । बने रहय त संतु हर फुलेरा के बड़ गुन गावय । मोर मेहरारू देवी के अवतार ए गा , मोर माँ -बाप के अइसन सेवा करथे जईसे उही उकर कोरा म जनमे हे । जब ले आये हे कमातेच हे , ओहर अनुसुइया कस पतिवरता नारी ए , दूसर मनखे डहर झाँकय नहीं । फेर दारू हर ओखर भीतरी जाय त सब्बो गियान जाने कहाँ नन्दा जाय । पीके आव य अउ फुलेरा ल मरत ले ठठावय , रुपया ल मोर ले लुका के कहाँ राखथस , बता कइके । आनी-बानी के जिनिस लेवत हस अउ मोला पइसा नइये कहिथस । साग बेचे के नांव म अतेक पटाव सिंगार करे के का काम हे , कोन जनी काखर तीर मुंह ल मार के आथस । आनी बानी के गोठ अब्बड़ खिक बोलय त फुलेरा ल लाज लगय । लइका मन घलो अब समझे के ल इक होगे रिहिन पीके आय बाय बकय त फुलेरा ल बने नई लागय । लइका मन के मन हर कच्चा माटी सही रहिथे ओमा जौन बीजा ल बोहु वैसनहे पेड़ जामहि । फुलेरा हर इही जतन करय के उकर आघु म संतु हर झन बगियावय ।

बरसात हर तको ए दरी अतलंग कर डारिस , कई दिन ले सुरुज देवता हर दर्सन नई देहे । घर-दुवारी ,दिवार पानी म फुलगे । फुलेरा ल ओ दिन बने नई लगत रिहिस , हाथ गोड़ मरो जियो पिरात रिहिस । जाड़ घलो लागत रिहिस , परोसिन रमौतीन घलव साग बेचय ,ओला ओ दिन अपन साग भाजी ल दे दिस सरय झन कइके । मुहल्ला के चंद्राकर डॉक्टर ल देखा के दवाई लान खा के ढलगे रिहिस तभे संतु हर दिनमान ढलगत आगे अउ खाना देहे बर चिचियाय लागिस । फुलेरा हर उठतेच रिहिस के मारे-पीटे ल चालू कर दिस । एक तो बीमार ऊपर ले दुबर पातर फुलेरा भदाक ले गिर गे । जोर ले ओहा पीरा के मारे किकीयाय लागिस । पारा-परोसी के मनखे ओला हस्पताल लेगीन अउ प्लास्टर लगवा के बपरी घर आईस । ओखर गोड के हाड़ा हर टूट गे रिहिस । ओहि दिन ओला ओ मुहल्ला के पार्षद रवि भैया हर किहिस –”एखर तैं रिपोर्ट कर फुलेरा , पुलिस के डंडा हर परथे तभे अइसनहे मन सोझ होथे । अन्याव ल सहई घलो हर अन्याव करे के बरोबर होथे ।” हर रिश्ता के अपन मरजाद होथे जेला दुनो झन ल निभाय ल परथे । एक हाथ म कभू ताली नई बाजय । हमर भारतीय औरत मन कतको मार खाहिं फेर आदमी ल कुछु नई कहय ,
मार खा के अपन गोसईया ल खाय बर पूछथे , उंखर नखरा सहिथे । पानी हर मुड़ी ले ऊपर होथे त तउरे बर सीखेच ल परथे । फेर फुलेरा हर जान दे कहिके टरका दिस ।
संतु हर चार दिन बाद घर आईस । गोड़ टूटे के बाद फुलेरा के साग बेचई बंद होगे , जुम्मेदारी ल भगइया आदमी ल देख के ओखर मन खराब होगे । मारिस त मारिस ,एक घ खड़े होके देख तो लेतीस कि ओखर का हाल होगे ।
बुजुर्ग सास-ससुर मन साग भाजी के तोरा ल करय , लइका मन फुलेरा के अब्बड़ जतन करिन । एक महीना आराम करे के बाद ओहर बइठे-बइठे साग बेचे लागिस । थोरकन दिन संतु घलो कुछु कहीं किराना समान लेके आ जावय । ठोकर खाके आदमी सीख जाय त ओखर गलती के माफी मिल जाथे । मार खाके फुलेरा के मन म इही आस रिहिस के कहूँ संतु हर सुधर जाहि त ओखर जिनगी सुधर जाहि । कुकुर के पूछी सीध हो जाहि फेर दरूहा के दारू नई छूटय । अब्बड़ हिम्मत वाले मन एक घ धर के छोड़ पाथे नई ते ये दारू हर जानेच लेके छोड़थे । कइसे ओ दिन हर बीतिस तेला रमौतीन , पारा ,परोसी सब्बो जानथे । फेर संतु हर नई सुधरिस । उंखर जिनगी रेचेर- मैचेर चलत रिहिस । तेखर एक साल बाद ओमन दुनो झन ठेला लेके निकरे रिहिन , आधा रद्दा म संतु हर ओखर ले रुपया नँगाय लागिस । ओला देखिस त फुलेरा हर रुपिया ल अपन ब्लाउज म लुकावत रहीस के ओहर देख डारिस । रुपिया लुटे बर ओखर बाहीं ल चारों मुड़ा घुमाइस त पीरा के मारे फुलेरा चिल्लाय लागिस–” ए ददा , दाई ओ , मार डारिस ओ । लोगन दौरत आईन देखो-देखो होगे । कट ले ओखर बाजू हर बाजिस फेर हाड़ा हर टूट गे रिहिस । आजु-बाजु के दुकानदार अउ रवि भैया मन दौड़ के आइन अउ संतु ल अब्बड़ मारिन । बिचारी हर साग बेच के तोर अउ लइका मन के पेट भरत हे अउ तेहर दारू पिये बर ओखर हाथ-गोड़ ल टोरत हस । उही दिन पुलिस थाना म रिपोर्ट कर के ओला भीतरिया दे रहितिस त आज के घटना हर नई घटतीस ।
डेरावत-डेरावत रमौतीन हर फुलेरा के घर के डेहरी म पाँव रखिस —संतु हर लहुलुहान भुंइया म परे रिहिस अउ उही तीर फुलेरा हर चुप्प बइठे रिहिस । घेरिबेरी मार खा-खा के संतु ल माफ करइया फुलेरा ल ए दरी का होगे के ओहर तवा म ओकर मुड़ ल मारे रिहिस । कइसे अतेक हिम्मत जोर डारे फुलेरा, रमौतीन हर ओला पोटार के रोये लगिस । धीर लगा के फुलेरा कहीस –” जब तक बात मोर तक रिहिसे तब तक सहत रेहेंव रमौतीन ,फेर जब मोर लइका मन उपर ओहर हाथ उठाइस त मै नई देख सकेंव । मैं मार खायेंव त खायेंव ,मोर लइका मन मार नई खावय । उंखर रक्षा करे बर महतारी ल अपनेच अपन शक्ति मिल जाथे । बिल ई , कुकुर जइसे जानवर मन अपन लइका के रक्षा बर गुर्राथे त मेंहर तो मइनखे के जात अव । जौन हर मोर लइका ऊपर गलत नजर डारहि ओला मैं नई छोडव । एमा भगवान के मर्जी रिहिस ,अउ का कहव ।
काल हर त अपन गति ले चलत रहिथे । दु बछर पेशी अदालत होइस , पूरा मुहल्ला हर फुलेरा के घर बचाय बर खड़े होगे । संतु के पिछला सब रिकॉर्ड ल देख के , अउ आत्मरक्षा बर करे नियाव ल देख के अदालत हर फुलेरा ल हत्या के आरोप ले बाइज्जत बरी कर दिस । दारू के राक्षस हर संतु के जिनगी ल लील गे । देर-सबेर फुलेरा ल ओ महाराक्षस ले मुक्ति मिलगे अउ ओहर सुख-चैन से लइका मन संग रहे लागिस।

💞💞💞💞💞💞